Thlarau ti rawl 5

"The most beautiful thing we can experience is the mysterious."

Albert Einstein

Zisuh Krih khamhtu le Bawi ah kan cohlan le cangka bak in a cang colh mi thil tlawmpal in zoh tti hna hmanh usih.
Pathian sinin Sual ngaihthiam nak kan hmuh. Zungzal nunnak a kan pek. Pathian fa sinak a kan pek. Pathian innchungkhar ah chungkhar thar kan hung si ve. Nunhlun vialte an lo dih i nunning thar aa thok. etc... Cu vial te pin ah Vancung ram mi sinak Citizenship thar a kan pek i zungzal in Pathian he um ti nak nawl le ruahchannak a kan pek. etc...

Vancung ram mi sinak kan neih ko bu ah hi vulei ah a um rihmi kan si caah Vancung rammi kan si nak 'values' man a kan neihter tu, kan biapit ter tu nunzia dawh, nunning thar hna hi kan nunnak ah kan hriam tuai ter an hau. Cu thil hna cu chunglei in a hung chuak i lenglei ah langhter, hmuh khawh in an um ah cun Zumhnak ah puitlinnak lam azawh lio mi kan si nak hmelchunh an si. Chunglei nunzia (Inner Quality) anei lo mi nih Krihfa ka si aa ti ve hmanh ah Bawi Krih he an iton tak le tak lo hi ruahawk tlak ngai te asi.

India ram ah nihin tiang bia el nak a ummi pakhat cu, Mahatma Gandhi hi Krihfa asi ti mi le Krihfa a si lo tinak hi asi ve. A nunning an zoh tik ah, dawtnak, zawnruah nak, bawmhchanh duhnak, sunparnak mitthitlonak, etc.. te hna aneihmi nih hitluk i chunglei nunnak ah aa dawhmi le a hminmi cu Krih a rak ton ve caah a si lai tiah a ruatmi an um len. Pu Gandhi hi Krihfa asi pek/ si lo pek ah afiangmi pakhat cu a tthan lianhnak le a nunnak le a cacawnnak hna zoh tik ah krihfa sianginn te hna ah a rak kai, Krihfa ttha ampi a rak komh bel hna, etc.. hna asi ca le Biakam thar a rak duh tuk nak te hna ruah tuk ah Krih hi pumpak tein khamh tu i a rak cohlan lo hmanh ah Krih i a values hna nih a nunnak hi a rak thlen ve timi cu el awk ttha lo asi.

Muidawh tlinnak cu chunglei nunzia ( Innner quality) ah asi i cu cu Krih fa le hna kan caah a biapi tuk mi asi. Chunglei nunnak ah aa dawh lomi le a hmin rih lomi cu hmanthlak taktak kan si kho rih lo. Pathian nih a kan duh piak mi zong chunglei nunzia remh le tthatter hmasa asi. Chunglei nunzia quality a tthat i leng ah a lang tik ah dawtnak, remnak chuahpi tu, velngeihnak etc.. te hna in thei a hung par tawn. Cu cu dawhnak taktak zong asi.

Bible ah Umser tu na si, kei tlak ka si, na duh bang in ka sersiam ko tiah Profet nih a chimnak kan hmuh. Chunglei nunzia ttha kan neih khawh ve nak cu Pathian nih a kan sersiam ahau. Nihin ah na ton cuahmah mi dawn phen ngaitu ah na ruahmi kha na caah Pathian kutneh zong asi kho men. Prof. PKD Lee nih Chunglei nunzia remhnak ah Pathian hriamnam pakhat cu 'willing to do what we dont like to do' tiah min a bunh. Na boss nih rian an khinhmi na rem tuk lo mi etc.. hna lungtho le lawm tein tuah duhnak ti khawh asi. Vailam tahnak in ding ah Bawi Krih nih,'Ka pa hi hrai hi ka tthial piak ko, sihmanh seh law nangmah duhnak tu si ko seh' ati mi khi asawh duhnak cu asi. Huamlo, duhlo, complain hmannak etc.. hna a umlo cikcek hnu i a chuakmi nunzia dawh kha chim duhmi cu asi.
Pathian hmanrua ttha kan si khawh cio nak hnga, chunglei nunzia dawh in kan khah cio nak hnga thlarau lei mit au a zaa cang. Pathian ca le mipi caah hmanrua ttha si cio hna usih.!!!!!!