Laica ttial tu Uar nan um

Laitlang ka chuah tak nak kumkhua a sauh pah ve cang caah Laica ttialmi cauk tete ka sin a phan kho mi hi an tlawm ngai te. Cun, theology cawng mi ka si ca zong ah asi kho men, Biaknak lei ca deuh hi ka rel tawn. Ram leng chin ka phanh hnu hin caan ka neih poh ah secular lei ca hi ka van banh pah tawn ve. Times, Newsweek tu hi cu kutken ban tuk ah kai ruah hna. Ka rel thlu lem lo hna hmanh ah Perspective phun2 an ttial mi khi kai hlawt pi ngai. India in US ah a pem i US citizen asi cang mi Fareed Zachariah le mirang pa Joe Klein hna cattial hi mit a au ter ngai fawn, magazine ah cun.

Kan Lai ca holh tu cu tam ka rel rih hna lo nain, rel hninkhat chung ah cun atang lei hawikom hi ka lung an ka hlang ngai ngai. Min changchang ka ttial ruang ah pakhat nak, pa hnihnak ti nak si loin, lung chuahning poh in ka ttial bia tu an si.

1. Albert Ceuhlun: Pahlun kan hei ti cio. Linguistics in P. hD a tuah cuah mah lio mi asi. India i Siang cachim a ttuan lio ah hin Reader Digest hi thlah lo i a rak rel peng mi asi. A cattial hi a creative bak. Copy Rights a upat tuk fawn. Ca um kal ning a thei i reality alanghter kho tuk. 'Maivan' ti zong hi a mah siam mi biafang asi ko rua.

2. Richard Zatu : A cattial nih biatak tein fim a kan chimh. A biatluan an idawh fawn. Amah ruahnak te i ca a ttial pin ah mirang ca zong Lai in a leh tawn i, a mirang i ka relmi nak in aleh cia mi rel ah lung a pem kho deuh. Ca a ttial cia vialte hi khawmh in a uk in kan chuah piak seh ti saduh ka that ngai te.

3. Thlasui Tluangneh : Holh um kal ning a thei taktak si. Wuthering Heights aleh mi ka rel bakin ka lau! Cutluk thiam cu ka ti len. Forum chung ah cun a active ti lo, ahlan bang.

4. Salai Siangawr Vanhnin: Thlah lo tein ca a ttial peng i ka lawmh zung zal. Education lei kong a ttial mi ko an ttha.

5. Rev. Dr. Sang Awr: Biaknak lei deuh a ttial i puitling taktak in bia a fun tawn. A personality a ttha tuk timi hi a cattial ah a lang kho. Ka Pu asi ko bu ah, pumpak hrimhrim in ka upat tuk.

6. Pu Mang Cung Nung: A cattial tlawm tuk nain a ttial mi hninkhat nih a khen peng a hmuitinh cu.

7. Salai Bawi Lian Mang: Laica a ttialmi hmuh ding atlawm ngai nain 2006 hrawng asi rua, Chin National day tuah lai i Indianapolis Lai Unau hna an itimh lamhnak a ttialmi forum chung ah ka rel i cu kum chung Lai ca ttialmi ka rel khawh tawk ah pakhatnak ka rak pek. 'Yahtah' phun tling bak asi. Ziah Laica hi tampi in a ttial hnga lo ka ti leng mang. Rak chim cio te uh, Lai ca hi van ttial lengmang ve seh.

8. Pu Lian Uk: Cattial thiam tuk cu asi lo nain, ka lawmh taktak. Ca a ttial kho peng i hiti ding bak hi si ka ti len. Forum chung i a ca ttial ka hmuh lo ah cun ka lung leng manh.

9. Nancy Zatu: Mino te sidawh asi. Muko Magazine i a ca ttial lawngin ka theih chom nain a men loh. Fianghlang te le rel nuam taktak in a ttial. Creative tein a ttial fawn. Izuam chin seh.

10. Perhkalh: A cafung min asi i Norway ah a um. Laica a daw ngaingai.

11. Thuro Editor: Kawlram Politik kong commentary phunin Laiholh te i a ttial mi nih thangtthat a hlawh ter tuk.

Adang zong an tam pi rih nain, hi vial lawng si rih seh. Laica ttialtu hna upat kan pek hna. Nan cattial mi nih nun a kan chimh hringhran.