Damnak

Japan kum 6 leng ka um chung ah tutan hi thokho lo lak in ka zawt asi. Ni3 asi cang i kai hlei lo. kakhuaruah a har ngai. Ka taksa peng i lungmit nawn in ka um peng. Nizan cu Sizung ka va kal i sii tam nawn an ka pek. Tizen an ka laak i Drip an ka thlaih.

Bible chung ah damnak kong he pehtlai in Psalm 103:1,2,3 "....Ka sualnak vialte kha a ka ngaihthiam i ka zawtnak vial te kha a ka dam ter" tiah kan hmuh. Voi tampi cu damnak kong ah hin sibawi hi kan ibochan tuk tawn ruang zong ah asi pah kho men. James cakuat chung hna ah cun, Krihfa upa hna nih chiti huh hna seh law thlacam piak hna seh ti zong kan hmuh. Tutan cu thlacamnak rumro ka lung ah a um.
"Pathian na hmaika ah hin mitling lo ka si i, mi chambau ka si. Na ka fialmi rian hmanh tlamtlinh khawh lo in kai phet lengmang. Na hmaika ka sualpalhnak le tlin lonak vial te hi ka ngaithiam hna law, nangmah sunpar nak caah ka tim lam. Ka zawtnak hna hi ka dam ter. Zisuh Krih thawngin damnak ka hmuh ter" ti i fak pi thlacam rumro ka lung chuak ko.

Voikhat cu, sunday school ngakchia ka rak cawn piak hna i hmailei ah zei dah si nan duh tiah. Nu ngakchia pakhat nih sibawi ati, cun missionary ati. A tha tuk, damlo mi si na chunh hna lai cu ka ti bak cu, si lo, thla ka cam piak hna lai a rak ka ti ko e....Pathian nih hin sibawi te hmang zongin a kan dam ter i, a caan ah cun sual ngaihthiam hal i thlacam piak i damnak hmuh zong a um. Samaria mitha pa tuan bia kan zoh ah cun, thlacam piak nak si loin, thlopbul nak in a dam. Nain, mitam pi tu cu Bawi Zisuh nih bia ka khat te a chimnak in an dam. A caan ah rian a fial hna i an tuah ah cun an dam.

Zei si hmanh ah Damnak cu Pathian sin a ra mi asi. Pathian kan damnak asi.