Dawtnak hmual

Dawtnak kong hi chim le rel cio asi nain, a taktak ah cun mizawn van ruah le van dawt taktak hi thil har ngaimi a lo tawn. Phunzai nak um lo tein ahlei cee lam va kal chap a si caah amiak lawng a zohtu hna caah cun hnulei chit tak colh ding hi afawi hringhran ko. Neihchiah lei in van tah ah cun, har riangmang tein kawl hawl mi, voikhat ah hman dih ko ding cu sian ding hrim khi asi hnga lo. Hlan deuh lio i kan Nu le Pa, Pi le Pu hna nih mah eiding siang loin, Khualtlung neih tik ah eidin te ding ti in an rak thleidan mi meicung sapherh te khi ka lung ah a chuak tawn!

2002 kum khuasik chuah hlan deuh, Avoi hnihnak Japan ka tlawn lio ah asi. New Delhi-Hongkong- Osaka tiin Cathy Pacific Airline in Osaka khualipi cu zantlai nawn ah ka phan. Hotel reservation tuah cia mi ka neihlo caah Airport kam Hotel ka hei fuh colh. Zankhat riah man ka hal hna cu, ka mit Vei tiatia in ka au colh. Only 25000 Yen per night for single, an ti. US $ 230 tluk hrawng asi hnga! Cu zat rilmal cu!!! India ram Bible sianginn ka rak kai lio i kumkhat chung ka hmanmi nak in a tam deuh. A chapchap ah ka kut chung ah US $250 hrawng lawng hi ka neihmi asi rua dah ka ti, ka suitcase man fawnh chih in... New Delhi in kaa thawh lai ah Hotel telephone number ka khawmh ta mi pawl kha pakhat hnu pakhat ka chawnh hna i riahman ka hal pah chih thluahmah hna. Vantthat ah, Hotel seagull timi nih ttha tein an rak ka leh.

Tlawmpal ah shuttle bus nih a rak ka dawn i Hotel lei ah a ka hruai. Room ttha deuhmi pawl a dih cang i Room hme deuh mi ah mantlawm deuh tu kan in lak lai apoi lai maw tiah, iangnei leoleu te nih a van ka nawl. Elaw khei! Manlak lo i tthut sawhsawh hmanh pei ka ngamh cu tiah, ka Amen colh. Room chung ka luh cu khuaruah har lei khi asi, aman tlawm rup cun Japan ah cun a zaa taktak khi asi. Aw! Bawipa, Pathian ka lungchung hramnak aw na rak theih dah mu!!!

Athaizing cu Tokyo lei kal dingin tlanglawng zung tiang shuttle bus nih cun a ka thlah tthan. Shinkansen(Bullet train) ticket ka van cawk i phaisa ka neih huaha ti lo caah, lampi tluan chung cu theihaang ttukttak irinh chawmh dingin ka tim. Osaka - Tokyo hi Shinkansen cun suimilam 3:30 tluk hrawng a rau. Khuaruah har ngai asi mi cu, cu tlanglawng cit cu dah kaw Vanlawng cung tthut he aa lo pah cu e...Hakha i Tang hra ka rak cawn lio ah, kan saya pa nih arak chim tawn i zumh khawh ka rak iharh ngaimi cu hi Japan Sinkansen kong hi a si. "Japan ram i bullet train cu khuakhat in khuakhat kar a kal lio ah Thlalang hrai chung ah cawhnuk a khat in an chiah i atle bak loh" arak ti. Asi tak hnga maw tiah, Caku hrai khat in tii ka chiah ve i Tokyo ka phanh tiang hi dor khat zong atle tak lo e...Nan zum cio hnga maw? Maw...Kawltlawng bia le tipil bia nan ka ti piak ve hnga dek! Cu tluk cun dah mu adaih khawh ka ti cu! Acit nuamh ning hi, fing le tlang ka cuan pah, ka ngu pah, hngilhtak ka siang fawn loh...um..umm ..Tlawmpal ah ka kam tthumi pawl nih chuncaw an van icawk cio hna i, arim nih ka chunglei te ahei sawh ve ko nain tii le pepsi kaa dinh chih i ttamlo te khi ka lo ve ko rua dah ka ti...

Tokyo ka phanh cu, tthal ti cu a lum taktak khi asi. Ka nau le Inn ka hei panh colh, pumh kal an rak itimh lio asi cang. Cu zan cu, hawikom pawl ka vun phone hna i an lau, ziah na phanh lai thawng na kan thanh lo tiah. Athaizing ah Kachin pastor ka hawipa nih an inn um dingin a rak ka laak. Zarh khat tluk ka caam hnu ah, voikhat cu Conference pakhat a um i ka kal ve. Thawngtha bia chim zong a ttha i, praise and worrship zong a nuam ngaingai. Cu lio ah cun, ka kam ah Japan nu va hna an tthu ve. Japan holh in an ka chawnh lengmang nain, holh ka thiam lo tiah mirang in ka hei ti hna. Ka Laimui te zong khin hei ruahdamh pah ve awk an si nain:) Tlawmpal bia kan iruah hna cun, thawngtha bia chim tu ka si nak le Japan ka hawng tlawn ve nak ka chimh hna. Rem cang ah zaanriah ei-tti ding le thlacam piak dingin an ka sawm i, OK ka hei ti ko hna.

Zarh 2 hrawng a rauh ah Rawl-ei a ka sawm tu hna chung he cun kan itong hna. An umnak Station hi Tokyo area chung asi nain tlawnglawng in 1hr deng kal asi. Biakinn ah kal hmasa usih iah ati caah Biakinn cu kan fuh. An Pastor te he kan ikom hna i zumhnak kong, Krihfa nun kong, Evangelism kong te hna a phunphun kan iruah hna. Cu zarh cu an sin phung chim ding zong an ka sawm colh. Pathian thlarau rianttuan ning hi dah ngai minung nih theihawk a ttha tawn lo e...Ruahlo ah, an Pastor pa nih kan mah he rianttuan tti dingin in sawm sih law na duh hnga maw tiah biatung a van dirh ko! Aaaa..ka khuaruah lei a har! Thlacamnak zong ka nei ve lai i, Pathian lamhruainak tu kan zoh hna lai. Tuhnu thlakhat ah bia kan leh te hna lai tiah ka hei ti. Pathian dawtnak hmual hi a faak hringhran ko. Nihin tiang, Japan ka um chung vialte ka herhnak poh ah an ka bawmh i, taksa lei ah nu le pa bantuk in kai neih thai hna. Cattial thiam pa khat nih a rak chim bal. "Pathian nih lam pakhat an khar piak ah cun, lam dang an hun piak tthan lai" ati. Ka nunnak ka ruah tawn tik ah phorhhlawt ding zeihmanh ka nei lo, Bawi Krih le Vailam tah lo cu ti hi ka fiang chin lengmang. Dawtnak hmual cu a rak faak hringhran, miphun pehtlaihnak nei lo pipi zong unau, nu le fa ah a kan siam ko.

Aliamcia kum 20 hrawng ah khan asi. Tokyo khua kil lei ah Cozah nih Innthar sak an timh caah a umcia mi thing Inn tete an tthet diahmah hna. Inn pakhat an ttheh i a vampang an boah lio ah Inntlawng laikeng hmete pakhat, Vam kar ah aphei zawn in thir nih a khenh chih nain a nung rih mi an hmuh. Zeitin dah a nunrih ning asi i, cu vam karlak ah cun thir nih a khenh chih ning asi hnga tiah an khuaruah a har dih. An vun ruah deuh tik ah, kum 10 luancia kha Inn an rak sak lio i arak cangmi asi kha an hngalh. Khuaruah har in an zoh ko lio ah, cu vam a van changtu Vam tang in laikeng hmete dang pakhat rawl iseh bu in a hawng mangmi pakhat an hmuh. Cu hlan chung vialte cu a hawile laikeng dang nih rawl an rak pek peng ti a fiang. ( Japan thing Inn pawl hi Vam phen an lawng hna). Zei tluk dawtnak ngan in dah thil nung hmete te hmanh an zawn an iruah. Dawtnak nih hin khuaruah har thil a tuah zungzal ko.

( Hi capar hi 2005 ah ka rak ttial cang nain ka chuah bello, Forum ah ka rak tar hrulh a can ceo in. Nihin ah tlawmpal ka chap i, CIM sermon ka rak ttial bal mi he ka fonh chih mi asi)