Thlarau ti rawl 3 ( Nunzia remhnak)

"As long as habit and routine dictate the pattern of living, new dimensions of the soul will not emerge".
Henry Van Dyke

Zeitin dah ka nunzia hi kai remh khawh ve lai ti hi voi tam pi ka ruat tawn. Aherh lo caan ah ka thinhung tawn i hmurka ttha lo hnain bia chim ka hmang ve tawn. Apoi tuk ka ti tik ah cun caan arak liam thluahmah cang ai! Nunphung sang ngai le nunzia dawh tuk i atthangmi hna ram i ka um tik ah, ka polite lo tuk tawn ning nih ning a ka zah tuk tawn ttheo. An nunnem ning le bia dawh tete le hmurka thlum tein mi an chawnh biak tawn ka hmuh tik ah kai cawn pah tawn ve nain keimah kel ah ka chuak ttheo. Krihfa ka si nak ziaza nih maw a daih hnga lo ti zong ka ruat phah.

Lentecelhnak ka tlaihchan ngai caah tennis ka tuk tawnnak in ka nunnak ah a cangmi tlawmpal in in ruah hna ka duh. Tennis ka tuk ve nak hi kum 2 deng ati cang nain, basic ah kai hrol lengmang rih ko. Ka coach pa nih midang he itah tthimh hlah, nangmah tawk te in thiam izuam a ka ti ttheo. Basic nan expert hnu lawng ah level dang hi zohdawh tein nan thiam khawh lai! Basic hi tennis nan tuk ning cang nunzia (habit) asi hmasat a herh. Nan tuk ve sawh mi kha ka duh lo, zoh dawh le thiam taktak tein tu ve law ti kan duh hna tiah a kan cawn piak tawn. Cu bia nih cun thazaang a ka pek hringhran.

Athiamcia mi hna le Pro hna an icelhning zoh ah cun a awlzaang mi te a lo ngai. Asi nain, mah nih van icelh ve taktak ah cun a har lawng si loin Basic position te lawng hmanh cu saunawn cawn hau asi tak. Cute hmanh cu a kum nawn in tonghtham hnu hmanh ah expert ngaingai a har rih. Minthang pawl Roger federer, Rafael Nadal, Andy Roddick etc. te pawl hna khi an hmet lio tein heh tiah coach nih a cawn piak hna bu ah fak piin a cawng i a practice peng mi an si hna. An thiam tuk, an tuk ning ai dawh tuk tiah kan ti mi khi kum sau pi an cawn hnu ah an langhter khawh ve mi asi. Khatlei chim ah cun, kum tampi an practice hnu ah an nunning ah a cang cang i zoh dawh te le thiam ngai in an tuk khawh peng ti khawh asi.

Voikhat lungthawh phutnak in nunzia dawh hna khi cawn kan itim tawn i voikhat, hnih te cu kan tuah khawh tawn ve ko nain, kan tuah khawh peng tawn lonak hna cu kan nunning ah a can rih lo ca tu ah an si. Kan nunning cang in nunzia ah kan ineih khawh hlan chung poh cu kan si tthan lengmang ko lai. Cu caah cun, thiltha siseh ti kan duhmi kha nunzia (habit) ah kan canter khawh ve nak lai kan zuamcawh a hau. Thintawi ngai, ingchiat ngai hna khi nunzia ah ai neih cang mi nih cun caan sau nawn ai remh a hau. Voikhat ah, zuk, zek tiah a cang mi an si lo. Cu ti si ah cun, zeitin dah thilttha kan duhmi cu nunzia ah ka ineih khawh ve ne lai?

1. Iremh duhnak lungput kan neih hmasat a herh
2. Remh ai timmi kan si kha itheih peng ding
3. Pathian sin ah bawmhnak hal zungzal ding
4. Zing fatin dai tein um (meditate) nak le bible relnak neih leng mang ding
5. Lungthin a hnawnh ter tu cachia rel lo/movie chia hna zoh lo ding etc..

Acunglei hi atlangpi deuh an si hna. Krihfa kan sinak ah midang he thleidannak kan neihnak ding cu nunzia ah hin asi ding asi. Krih i a nunzia kha kan nunzia chung ah zei maw zat ai hrolh hlan chung poh cu hmantlak taktak kan si rih lo ti nak asi.

President Obama kha Campaign a tuah lio ah soisel le nihsawh a tong ngai ngai. Bia an hal i a lehmi hna cu, hi tluk in an in soisel, bia phunphun an in puh. Ziah na soisel in na doh ve hna lo tiah bia an hal. "Soisel le mi va doh len ve hi ka nunzia asi lo. Ka campaign staff hna nih an tuah ve ah cun ka fire (riandinh ter) hna lai ati. Cu cu mipuitling khuaruah ning asi i, Krihfa le hna kan nunning ding zong asi ve. Midang nih an ti ve poh ah va lehrulh ve si loin, Krih i a dir hmun kha kan dir hmun asi awk asi ve. Cu cu kan nuzia (habit) ah a can ve asi ah cun Bawi Krih caah hmantlak kan si lawng si lo in vulei ah theipar ttha a chuahpi tu kan si ve lai.