Dawhnak

Dawhnak Taktak

2010 kumthar chung ah kan lut thluah mah tthan cang I, zei kar lo ah kum le can hi aliam manh theih asi ti lo. “Hngakchia caah cun can hi a vah tein a vaak ve, mino caah cun a kal I, rual-u le hna caah cun atlik in atli” tiah mifim bia a um. Nizan tihni te ah Japan kan phan rua kan ti lio ah kum tam nawn arak liam diam ai! Cu chung vialte kan sining, kan nunning etc… hna kan izoh tthan cio ah cun ‘elaw’ tiah ichir mi tampi cio neih dawh kan si. Aliam cia cu zeitiawk ttha ti hlah, ara lai mi caan hi tah zeitin dah tihi langhter ka duhmi asi.

Kum Zabu 21 nak chung ah kan lut cang I, Vulei cung thil umtu ning hi Modern Technology ruang ah aa thlen ning a rang tuk cang. Tu hnu kum 20 zong ah nihin kan dirhmun nak in thil tampi aa thleng lai I a tthangcho lai. Nihin I University Hngakchia hna hi a um rihlo mi rian caah aa tim laam mi an si ti tiang in an ti phah. Vulei cung Company vialte lak ah rianttuan nuamhcem nak ah an thimmi Google Inc., khi 1998 kum lawng ah Sianghlei runn cacawng lio hawikom pa 2 Larry le Sergey nih an rak thok I nihin ah cun staff 19,665 an nei I Kum 1 ah $28 Billion leng pi an miak. Zeitluk in dah thil thar an chuah I cu bantuk thil thar hna nih cun hlawknak ngan pipi an chuah pi ti cu ruah khawh cio asi.

Minung hi Pathian nih a kan sersiam ning hrim ah a tthangcho ding kan si. Tthancho nak panh in Lam azul mi lawngte kan si hna tiah chim khawh zong asi. Neihchiah lei tthancho, sinak lei tthancho, fimnak lei tthan cho etc…alam kipin tthancho nak hna hi Pathian nih a kan duh piakmi zong asi fawn. Cu lak ah ziaza le lungput ah zeitluk thuk dah kar kan hlan cio cang hna I, zeitluk dah ‘Iang’ kan ngeih cio hna hnga? ‘Iang’ cu “zoh sau deuh poh i hmuh chin lengmang mi duhnunnak tiah ti usi law, asi lo ah, zoh lengmang i a chuak chin lengmang mi dawhnak” tiah Pa Hlun nih ahrilh fiah. Ziaza lei Iang cu teh zeidah asi hnga? ‘Chunglei in achuak mi duhnunnak’ tiah aa rem ko rua hnga!

Minung kan I dawhnak taktak hi kan chunglei nunnak le ziaza hi an rak si ko rua! Cu caah cun, chunglei kan nunzia le lungput ah hmasawn cio kan herh I cucu kan kawl cio awk zong asi. Prof. Peter F. Drucker nih tuanbia a chim tawn mi cu, “BC 400 hrawng lio ah khan Phidias timi Zungthiam-pa hi Athen bawi hna nih Statute Ser an rak fial. Statute asiam mi cu alanghnak he, alangh khawh lo nak (zapi hmuh khawh lonak ahnulei) zong ttha tuk in asaih hna caah an iruahning nak in caan aa rauh deuh. Khua bawi hna nih thinhun ngai in, “Ziah a hnulei hmuhkhawhlo nak hna hi ahmailei a langhnak tluk te’n ttha le Dawh in na siam, ahlei in na ttuan mi man kan in pe lai lo” tiah an mawh chiat. Phidias nih a lehmi hna cu, “Alanghlo nak hi a Dawhter tu an si, Hmuhkhawhlo mi Pathian nih a zoh nak hna an si” tiah a leh hna. Cu statute cu nihin tiang ahmun rih I ahohmanh nih sunlawih cio mi asi.

Dawhnak tak tak hi alanghlo nak, chunglei ziaza hna an si I, Pathian nih a kan tahnak zong cuka hmun ah cun asi. Kan sinak taktak chunglei ziaza le nunzia hna ah atthangcho mi kan si hi abiapi tuk. Chaw va hna nih an cawk khawhlo mi lungman sung nak in asung lawi deuhmi zong an si. Chunglei dawhnak le duhnunnak cu Krihfa kan sinak ‘Iang’ zong asi. Fimthiamnak hna hi cawn I thiam khawh an si ah cun chunglei dawhnak zong cawn I dawhnak neih khawh asi ve. Lenglei sinak ah zeitluk tiang kan tthancho hmanh ah, chunglei dawhnak I a tthangcho lo mi kan si sual ding cu ngaihchia asi. Kan nunnak nih ‘Man’ a neihnak hmun zong asi caah thuam ttha in thuamh izuam cio hna sih.

(The Pic. above is taken from Japantoday.com)