Timhnak ciammam neih in hi blog hi ka tuahmi asi lem lo. Lungthawh caan tete i cattial nak le aherh pingpang mi tete chiahnak men ah ka ti nain, hmailei ah zei dek a lawh te hnga? Zei can tiang khi dek ka hei zoh khenh huam te fawn hnga?
Asi nain, cattial kai timh mi pawl cu, Biaknak le Vulei cung thil a cang mi tete, khua ka ruah mi tete, ti ban tuk pawl khi si te dawh an si. Kum zabu 21 nak hi, vulei cung thil ai thlen ning a cak tuk cang. Thil thar theih ding, kawl ding hna zong ti cawk an si ti lo. Hi chung i kan luh cuahmah lio ah, Lairam i kan rak um lio bantuk in khuaruah awk a ttha ti lo. Vulei pumpi huap in khuacuanh thiam le mit au a hau ve cang. "Dinnak, Daihnak, Dawt nak" karh ter nak ah alet in rian ttuan zong a hau.
Kan vulei sining tu cu ttumchuk lei a panh ti khawh asi. Khua caan a rawk, ral a tho, sualnak a karh, Paamnak a tam etc.. hi vial te zoh tik ah, Pathian pekmi kan Vulei kalning remh tthan a hau. Politik, chawkawl hawlnak, Ram rianttuan nak, Cacawn nak etc.. hi hna hi abikin sersiam tthan an hau. Cu mawh phurhnak neitu cu minung dang hlei si loin, ai pumpe mi le ruahning thar le ttha in khua khan ai tim tu 'ttuanvo tlamtlinh duhnak lungput' ' Responsible stewardshipness' he lam sial tthan a hau.
Cu thil hna a chuah khawhnak ding ah 'Ruahnak' ttha tampi fonh a herh. Pumpak zawn ruahnak kal tak a hau. Abik in lungthin a hnawntam rihlo mi mino hna ttuanvo a ngan khun. Krihfa kan si nak nuncan le ziaza he nawr ding zong asi fawn. Zei tluk in dah Krihfa le Laimi kan biapit cang ti cu a fiang thluahmah cang ko.
.................
No comments:
Post a Comment