'Iang'

(Atanglei capar hi Pu Albert Ceuhlun nih 6th Aug., 2009 ah Rungcin biaruah phu ah attial mi asi. A bia ttha tuk tiah ka tar tthan, aho nawl laa ta lo in. Arem lo nak um sual ah cun ka hnawh tthan colh lai. Hmanthlak hi ka tu nu te asi)

Iang (noun) hi mit nih cun fiangte in an hmuh ko na'n, hmurka tu nih cun zei set a si ti chim awk ah aa harh nawn. A tawifawi nak cun, iang cu zoh sau deuh poh i hmuh chin lengmang mi duhnunnak tiah ti usi law, asi lo ah, zoh lengmang i a chuak chin lengmang mi dawhnak ti zong ah a hmaan pah ko hnga dah ka ti.

Iang a ngei mi hi alanghlat cun midawh in an lang lem lai lo. Hmaitonh te i zoh le nihmerh bu i bia iruah ko ah duh an nun a lang chin lengmang. Mit an hneem chin lengmang. Vawleicung minthang bik suaizung Mona Lisa khi zoh lengmang ah a merh nak le a duhnun nak a lang chin lengmang. Mah ruang ah cun zoh an cim lo i a min a than khi a si. Mah cu iang ngeih a si. Diamond tthi khi zoh ah cun thlalang sawhsawh a lo ko. Na'n aa oih tu a cawlcangh ah khin zeimaw zawn, zeimaw zawn ah ceu a chuak lengmang i aa dawh nak khi ruah lo zawn ah hmuh lengmang a si. Mah ruang ah cun diamond an sunh tuk nak cu a si ve. "Diamond cu iang a ngei" ka ti lai.

Midawh hi iang an ngei maw ti ah cun acheu cu an ngei ve ko; nain an muidawh nih a laan i peidek, an iang a lang kho tawn rua lo ka ti. Minak nawn sin ko ah iang hi lang seh law ka lawhter. Mirang hi midawh cu an tam na'n iangngei an tlawm ka ti. Rangoon Tuluk atam khi zohhlauh ah cun aa dawh in an lang i hmaitonh i bia iruah tik ah zoh awk an um hlei ti lo. Mah bantuk cu iang ngeih lo a si. "A tlauh" kan ti hna.

Laimi hi iang kan ngei rua (kanmah lawng hngan cu). Louisiana ah Tuluk pa pawl le Vietnam nu pawl he rian kan rak ttuantti i pakhatnu nih, "Nan miphun hi nanmah nak ngo deuh an um maw?" a rak ka ti. "An tor ta, aziah?" ka rak ti cu, Laimi a hngalh mi pa thum le kei kan nah aa khah kong a rak ka chimh. Na'n, ahnu ah, "Albert, nanmah miphun hi nan phun a dang; nan nak ko na'n nan mui ah zei dek a um, tthate i zoh lengmang ah..." a ka ti i a holhthiam nih a zaat ti lo. Iang nan ngei a kan ti duh nak a si rua ka ti ko. :)
Iang ngeih hi kei cu mui lawng ah ka hmang lo. Nunning, ziaza le umtu hoiher zong iang ka ngeihter ve. Biachim le holhrin zong. Hlasak aw hmanh hi iang ka ngeihter. A aw rau a ttha e an ti mi khi, 'a aw iang a ngei e' ti hmanh ka duh.

Pa Hlun