Ram Nuam Cem lei ah - IV

12th May, 2009

Thaithawh khim in mino poh kan inn tual in kan ihngak hna. Aathawh kho ding vial cu kan tling pah cang ko rua kan ti i, vasum lei kan panh. Khua in Lahva tiang hi meng 3 leng deuh asi lai. Kal lei cu chuktum lawngte asi i kir lei cu chokai huam chung kai ding asi. Tontir cem lungdonh in kan ihngak tthan ta hna, hmuhkhat ah a rual in kal siseh kan ti i. Camera bawm ka van hon cu, battery ka philh ko...Elaw...Kawi Thang ( Tv. Thangchin) nih tlawmngaih nak taktak he kir riangmang in a va laak than. Ahmai ka hei khah lo tuk ning le thanuam tuk in a ka laak piak ning cu aa tluk bak lai..:)

Vasum lei kan kal pah cun pangrang hrawng i lungthi an laak tawnnak zong kan hei hmuh pah. Serthlum dum tete zong alang in kan hei hmuh, pakhat cu ka Pu hlun dum asi rua. Canghmun zong kan pal pah i athlo lio mi zong an rak um. 'Hika hi kei ka lo asi' tiah Kawi Bawi nih a ka chimh. 'Thlaikheu a tha tuk lo i thlawh ding zong a um rih lo' ati. Tukum tthal cu ruahti a tlawm caah tiva te tampi zong an cat pah len an ti. Lahva zong cu a cah dengmang nak tete zong an um pah len. Ngafuan ruh, bom puah, dynamo her te hna an khap khawh ngai i Lahva hi nga a zua ngai rih leh lam.

Tiva kan phanh cun chuncaw le eirep pawl thlam ah kan ichiah ta hna, hngerhte nih a rak tlanh sual lai phan ah. Ka Pi nih chaang tlep 1 le chinawnrek aka funh ve i 'aalen' nih a ka phurh piak. Tiva kuang ah cun kan van i tthum cio hna. 'Cakei kuak' tili an ti i mipil le banthlir zong a lang bak loh a thuhnak zawn cu. Atili zong akau ngai. Thlang deuhin thok siseh tiah an van ti vial ah khin, 'hika hi maw tili thuk cem si?' tiah ka hal hna. 'Awh' an ti vial ah khin virvar kaa paih colh, ka mitbenh le luhkhuh hmanh phoih ta loin. An um kho cio rua lo, an ipaih thluahmah cio ve. Kan vio le au tthatning hna cu 'hnianghrawn' ciammam. Tlawmpal ah 'khah, thlang zuan zaa cang' an ti. Tiva kual kual 2 hrawng kan hei lan chap. Sawngkhawi tai ah ittem, sei he nungak tlangval 60 leng hrawng Lahva kuang i kan itlar cu kan khat tthup ko. Pa zong taalthing aa tlaih lo poh cu sei tlaih kan ichawng len cio hna. Ttingtang zong an iken i tiva kuang in heh tiah zai in a kan awi tawk zong an rak um. Nungak pawl nih 'Na tlai cang maw? ' an ka ti ah khin pa 6 hrawng ka rak tlaih diam ve ai..:) Tlawmpal ah Taal fung kaa tlaih ve i Lungngan nawn pakhat ka van kalh ve cu 'ngapum lian nawn le ngaikuang' 'vei' nih atlaih ko e!...'Eio' tiah kan au hna i, khah...kha bak kha cu sullam nei hrim hrim tiah an kan capo len..:)

Lahva kuang izit len cu a rak nuam taktak si. Ngahring dawi pah cun tili bantuk deuh a umnak poh ah kaa paih colh lengmang. Nungak pawl, anih hi cu arit theng lai loh tiah ka ruah damh deuh mi poh zong tii ah ka paih pah lengmang fawn hna :). Cakei kuak kan van phan tthan i atam u cu tili chung ah kan ipaih thluahmah hna. Nungak tlangval lawng te cu ti rilmal inuamh khawh hna cu tiah an kan ti cio theu lai. Nga zong Sei tan nak uak deuh kan tlaih. Chuncaw meh ah kan chuan hna. Zapi hmun khat ah kan dawi tti rua hna ti nalak ah, atthen, ngahlerh sio pah in sur hna an rak hrawng cu e. Tam ngai an tlaih ve i, cu dah kaw, tlunlai ah 'nangmah caah si e' an ka ti cu...aze le, cu ngai hna midawt cu, hmaikhap lo ngai bu in kaa lawm tuk hringhran ka ti hna.

Tlunlei cu cho ahrang ngai i hmuansam in kan tlung. IangIang hi kal der pah dawh asi ka ti i a kam ah kaa zi colh. Cho a hran tuk nak kan lonh in Za Ceu lungdonh kan phan. Zapi te in kan idin i meithal an vun chuah i hmui an ka sel ter. Ka van hmeh i 'Phung' tiah a khut tthat tuk ning cu.........,nain ka nganh deuh rua tu kha..:) Cu bak cun zapi kan ihlirh hna i hla kan sa, kan au khuang cio hna. 'Awh' ka ti manh hlan ah nungak keng cung in an ka tlik pi diam ko e...'Phung' 'pheng' tiah meithal aw aring len. 'Laiphung kan idawtnak asi, na el lai loh' tiah an van ka ti colh. 'Nuamhnak sawh asi loh, kan in dawt ve nak kan langhter nak asi' tiah an van nolh. Elaw khei..'ka rit tuk ttung i an zawt viar te hna la hi teh aw'....Khat lei kap zong in ka ruat ngai, hi tlukin dah mu khuami hna nih an ka dawt i an ka tlaihchan, zeite hmanh zong ka tuah khawh piak bel ttung hna lo...Azan zong khuadei deng tiang an ka tthut pi i an ka nuamh pi. Dang lengmang in ka ni, capo an chim mi te te zong....Khua mi hna an ka dawtnak cio cu a lianngan hringhran.....